ఆండ్రాయిడ్ మొబైల్ ఆపరేటింగ్ సిస్టం ప్రపంచంలో చాలా ఫేమస్. కానీ ఐవోఎస్‌లో పోలిస్తే ఆండ్రాయిడ్‌లో సెక్యూరిటీ కాస్త తక్కువగా ఉంటుంది. ఈ 10 తప్పులు ఫోన్ ఉపయోగించేటప్పుడు అస్సలు చేయకూడదు.
ప్రధానాంశాలు:
- ఐవోఎస్‌తో పోలిస్తే ఆండ్రాయిడ్ సెక్యూరిటీ కాస్త తక్కువే
- జాగ్రత్తలు పాటిస్తే డేటా సేఫే..
ప్రస్తుతం ప్రపంచంలో అత్యంత పాపులర్ మొబైల్ ఆపరేటింగ్ సిస్టంలు రెండే. ఒకటి ఐవోఎస్, రెండోది ఆండ్రాయిడ్. ఐవోఎస్‌ను యాపిల్ కేవలం ఐఫోన్లలో మాత్రమే అందిస్తుంది. దాంతోపాటు దానికి భద్రత కూడా ఎక్కువగా ఉంటుంది. కానీ ఆండ్రాయిడ్ అలా కాదు. ఐవోఎస్‌తో పోలిస్తే ఆండ్రాయిడ్‌లో సెక్యూరిటీ కాస్త తక్కువ. దీంతో హ్యాకర్లు, సైబర్ నేరగాళ్లు, అడ్వర్టైజర్లను ఆండ్రాయిడ్ సులువుగా ఆకర్షిస్తుంది. మీరు ఆండ్రాయిడ్ ఫోన్ ఉపయోగించేటప్పుడు కాస్త జాగ్రత్తగా ఉండటం కూడా అవసరం. ఆండ్రాయిడ్ స్మార్ట్ ఫోన్ ఉపయోగించేటప్పుడు మనం చేసే పది తప్పులు ఇవే..
1. బలమైన పాస్‌వర్డ్‌ను ఉపయోగించకపోవడం
మనం మన ఫోన్ లాక్ చేయడానికి ఫింగర్ ప్రింట్ లేదా ఫేస్ అన్‌లాక్‌ను ఉపయోగిస్తాం. దీంతోపాటు బలమైన పాస్ వర్డ్ కూడా ఉండాలి. కేవలం నాలుగంకెల పిన్ మాత్రమే ఉపయోగిస్తే.. మీ ఫోన్ అన్ లాక్ చేయడం మరింత సులభం అవుతుంది. కాబట్టి బలమైన పాస్‌వర్డ్‌ను సెట్ చేసుకోవాలి.
2. థర్డ్ పార్టీ యాప్స్‌ను అన్‌నోన్ సోర్స్ నుంచి ఇన్ స్టాల్ చేయడం
యాప్స్‌ను కేవలం ప్లేస్టోర్ నుంచి డౌన్ లోడ్ చేసుకోవడం ఉత్తమం. మనలో చాలా మంది గూగుల్ నుంచి యాప్స్ డౌన్‌లోడ్ చేయడం, లేకపోతే ఏపీకే ఫైల్స్ ఉపయోగించడం వంటివి చేస్తూ ఉంటారు. అది చాలా హానికరం. కాబట్టి ఇలా చేయకండి. మీకు కావాల్సిన యాప్స్‌ను ప్లేస్టోర్ నుంచే డౌన్‌లోడ్ చేసుకోండి.
3. ఫోన్ అప్ డేట్ చేయకపోవడం
మీ ఫోన్‌కు ఆండ్రాయిడ్ వెర్షన్ అప్ డేట్స్ కానీ, సెక్యూరిటీ అప్ డేట్స్ కానీ వస్తే.. వెంటనే అప్ డేట్ చేయండి. ఇన్ స్టాల్ చేసేందుకు కాస్త సమయం పట్టినప్పటికీ.. అది కచ్చితంగా మంచిదే. ఎందుకంటే పాత ఆపరేటింగ్ సిస్టంలు ఉపయోగించేవారిని టార్గెట్ చేసుకుని దాడులు చేసే హ్యాకర్లు కూడా ఉంటారు.
4. యాప్స్ డౌన్‌లోడ్ చేసేటప్పుడు నిబంధనలు చదవకపోవడం
ఒక యాప్ డౌన్‌లోడ్ చేసేటప్పుడు దాని సేవా నిబంధనలు, దానికి ఇవ్వాల్సిన అనుమతులు అన్నీ చదవాలి. ఆ యాప్‌కు అవసరమైన అనుమతులు ఇవ్వకూడదు. ఉదాహరణకు వాల్ పేపర్స్‌కు సంబంధించిన యాప్స్‌కు కాంటాక్ట్ బుక్ లేదా మైక్ వంటి యాక్సెస్‌లు అవసరం లేదు.
5. ఫోన్ పోయినా దాన్ని సెక్యూర్ చేసేలా చేయకపోవడం
మీరు ఎప్పుడు ఫోన్ కొన్నా అందులో గూగుల్ ఫైండ్ మై ఫోన్ సర్వీసును యాక్టివేట్ చేయాలి. దీంతోపాటు లాక్ స్క్రీన్ సెట్టింగ్స్‌ను కూడా మార్చుకోండి. పాస్‌వర్డ్ ఇవ్వకుండా ఫోన్ స్విచ్ ఆఫ్ చేయడం, మొబైల్ డేటా ఆఫ్ చేయడం వంటివి కుదరకుండా సెట్టింగ్స్‌లో మార్పులు చేయండి.
6. ఏ చార్జర్ పడితే ఆ చార్జర్ ఉపయోగించడం
ఎప్పుడూ హైక్వాలిటీ అడాప్టర్లు ఉపయోగించాలి. ఇప్పుడు అన్ని ఫోన్లలోనూ దాదాపు 5000 ఎంఏహెచ్ పైబడిన బ్యాటరీని అందిస్తున్నారు. అంత పెద్ద బ్యాటరీ చార్జ్ చేయాలంటే మంచి చార్జర్లు ఉండాలి. లో క్వాలిటీ చార్జర్లు ఉపయోగించకూడదు.
7. పర్సనల్ డేటా బ్యాకప్ చేయకపోవడం
మీ ఫోన్ పొరపాటున పోయినా, ఎవరైనా దొంగిలించినా, లేకపోతే పగిలిపోయినా అప్పుడు బ్యాకప్ లేకపోతే ఇబ్బంది అవుతుంది. మీ డేటా మొత్తం పోతుంది. అందుకే ఫోన్‌లో ఎప్పటికప్పుడు డేటాను బ్యాకప్ చేసుకోవాలి.
8. సెట్టింగ్స్‌లో ఇన్‌స్టాల్ అయిన యాప్స్ చెక్ చేసుకోకపోవడం
సెట్టింగ్స్‌లోకి వెళ్లి మీ ఫోన్‌లో ఏయే యాప్స్ ఉన్నాయో చెక్ చేసుకోవాలి. కొన్ని మాల్ వేర్ యాప్స్.. స్క్రీన్ మీద కనిపిండకుండా హైడ్ అయి ఉంటాయి. సెట్టింగ్స్‌లో అలాంటివి చూసుకుని డిలీట్ చేసుకుంటూ ఉండాలి.
9. పాత యాప్స్ డిలీట్ చేయకపోవడం
మనం ఉపయోగించని యాప్స్ ఏమైనా ఉంటే వాటిని అన్ ఇన్‌స్టాల్ చేయడం ఉత్తమం. అవుట్ డేటెడ్ యాప్స్ కూడా డిలీట్ చేయండి. ఎందుకంటే ఇటువంటి యాప్స్ మెమొరీని ఆక్రమించడమే కాకుండా, మాల్‌వేర్ కూడా ఉండే అవకాశం ఉంది.
10. గూగుల్ అకౌంట్ పాస్‌వర్డ్ మార్చకపోవడం
మీ గూగుల్ అకౌంట్ పాస్‌వర్డ్ కూడా ఎప్పటికప్పుడు మార్చుకోవాలి. దీనివల్ల ప్రైవసీకి భంగం వాటిల్లకుండా చూసుకోవచ్చు.
ఆండ్రాయిడ్ ఫోన్ వాడుతున్నారా? అయితే ఈ 10 తప్పులు అస్సలు చేయకండి! ANDROID USERS DON’T DO THESE 10 MISTAKES
