దక్షిణాఫ్రికాలో తొలిసారి గుర్తించిన కరోనా వైరస్ కొత్తరకం వేరియంట్ ఒమిక్రాన్.. క్రమంగా అన్ని దేశాలకూ వ్యాపిస్తోంది. భారత్‌లో రెండు రోజుల కిందట తొలి కేసు నమోదుకాగా.. ప్రస్తుతం ఆ సంఖ్య 21కి చేరింది.
- స్థానికంగా వ్యాప్తి దశలోకి ప్రవేశిస్తున్న ఒమిక్రాన్.
- మహారాష్ట్రలో ఒక్క రోజే ఏడుగురికి పాజిటివ్.
- కర్ణాటకలో నమోదయిన తొలి ఒమిక్రాన్ కేసు.
దేశంలో ఒమిక్రాన్ కేసులు కలవరానికి గురిచేస్తున్నాయి. ఆదివారం ఒక్క రోజే 17 ఒమిక్రాన్ వేరియంట్ కొవిడ్‌ కేసులు నమోదయ్యాయి. మహారాష్ట్రలో 7, రాజస్థాన్‌లో 9, ఢిల్లీలో ఒక కేసు నిర్దారణ అయ్యాయి. దీంతో దేశంలో మొత్తం కేసుల ఒమిక్రాన్ కేసుల సంఖ్య 21కి చేరింది. మొదట కర్ణాటకలో రెండు, గుజరాత్‌లో ఒకటి, ఢిల్లీలో ఒకటి, ముంబయిలో ఒకటి చొప్పున కేసులు నమోదైన సంగతి తెలిసిందే.
నైజీరియా నుంచి వచ్చిన పింప్రీ- చించ్వాడ్‌కు చెందిన ఓ మహిళ, ఆమె ఇద్దరు కుమార్తెలు, ఆ మహిళ సోదరుడు, అతడి ఇద్దరు కుమార్తెలకు ఒమిక్రాన్ వేరియంట్ నిర్ధారణ అయ్యింది. నలుగురు నైజీరియా నుంచి రాగా.. వారితో కాంటాక్ట్ అయిన ముగ్గురికి ఒమిక్రాన్ సోకినట్టు గుర్తించారు. ఫిన్లాండ్‌ నుంచి పుణేకు వచ్చిన మరో వ్యక్తిలోనూ కొత్తవేరియంట్ గుర్తించినట్లు అధికారులు తెలిపారు. దీంతో ఒక్క మహారాష్ట్రలోనే ఒమిక్రాన్ కేసుల సంఖ్య 8కి చేరింది.
అటు, రాజస్థాన్‌లో ఒకే కుటుంబంలోని 9 మంది ఒమిక్రాన్ బారినపడ్డారు. రాజధాని జైపూర్‌లోని ఆదర్ష్‌నగర్‌కు చెందిన ఒకే కుటుంబంలోని 9మందికి ఈ రకం వేరియంట్ వచ్చినట్లు రాష్ట్ర ప్రభుత్వం వెల్లడించింది. వీరంతా దక్షిణాఫ్రికా నుంచి ఇటీవల వచ్చినట్లు పేర్కొంది.
ఇక, జింబాబ్వే నుంచి వచ్చిన గుజరాత్‌లోని జామ్‌నగర్‌కు చెందిన వ్యక్తికి ఒమిక్రాన్ సోకిన విషయం తెలిసిందే. ఆ జామ్‌నగర్ వ్యక్తితో కాంటాక్ట్ అయిన ఇద్దరికి కోవిడ్ పాజిటివ్‌గా నిర్ధారణ అయ్యింది. వీరికి కూడా ఒమిక్రాన్ సోకినట్టు అనుమానిస్తున్నారు. వీరిలో ఒకరు జింబాబ్వే నుంచి వచ్చిన వ్యక్తి భార్యని అధికారులు తెలిపారు.
